Gin-athag ni Koronadal City Mayor Erlinda Araquil nga kabahin sang dugay na nga ginatalakay kag ginaplano sang lokal nga gobyerno ang pag-organisar liwat sang trapiko kag mga terminal sa syudad.
Sa interview sang Bombo Radyo Koronadal, ginpahayag ni Mayor Araquil nga ginahimo ang mga diskusyon kaupod ang Task Force Kaayusan, City Traffic kag nagkalain-lain nga departamento sang LGU agud mas mapauswag ang kahapsayan sa syudad.
Suno sa alkalde, isa sa mga panguna nga katuyuan sini amo ang paghan-ay sang trapiko sa palibot sang merkado publiko agud mangin mas hapos kag organisado ang pagsulod kag paggwa sang mga bisita kag manugbakal.
Ginpasiguro man niya nga wala sang tuyo ang lokal nga gobyerno nga pabudlayan ang mga pumuluyo, ilabi na ang mga nagasalig sa adlaw-adlaw nga pagpangabuhi.
Dugang pa ni Mayor Araquil, kinahanglan man nga maorganisar ang mga traysikol, jeep, multicab kag habal-habal agud malikawan ang wala sang han-ay nga pagterminal sa nagkalain-lain nga bahin sang syudad kag mapabilin nga matinlo kag matawhay ang palibot sang merkado publiko.
