Gina-awhag sang Philippine Health Insurance Corporation (PhilHealth) ang 11 ka mga pribado nga ospital sa rehiyon sang SOCCSKSARGEN nga ipatuman ang polisiya nga “No Balance Billing”, nga nagatuyo nga mapasangkad ang access sang mga miyembro sa libre nga serbisyo medikal.
Sa interview sang Bombo Radyo Koronadal ginpahayag ni Hanah Naanep, ang Public Relations Officer sa PhilHealth 12, kasunod ini sang pagpirma sang Memorandum of Agreement (MOA) sa tunga sang ahensya kag sining mga private healthcare facilities.
Sa idalom sang programa, ang mga ospital sang gobyerno ang kinahanglan nga mag-alokar sang 90 porsyento sang ila bed capacity para sa mga kwalipikado nga mga miyembro, samtang ang mga pribado nga ospital ang gina-engganyo nga mag-alokar sang 10 porsyento.
Nagasakop ang benepisyo sang mga kwalipikado nga mga pasyente nga gin-admit sa mga akomodasyon nga pareho sa ward; indi sila pagsukoton para sa mga balayran sa ospital—lakip ang mga balayran sa proffesional fee, mga bulong, mga laboratory examination, mga X-ray, kag iban pa nga kinahanglanon nga mga serbisyo.
Gindugang pa ni Naanep nga may mga pribado nga ospital nga nagapatuman na sang nasambit nga polisiya; apang ginahulat pa sang PhilHealth ang dugang nga pagsulundan sa pagpatuman nga magatumod kon ano nga mga medical cases kag kondisyon ang sakop sang programa.
Katuyuan sang sini nga inisyatibo nga mabuhinan ang gasto sa pagpabulong kag mahatagan ang mga katapo sang PhilHealth sang mas dako nga oportunidad nga maka-avail sang healthcare services sa mga pribado nga ospital.
