Ginpabutyag ni South Cotabato Governor Reynaldo Tamayo Jr. nga indi kinahanglan maghanda sing madamo nga pagkaon ukon maggasto sing daku agud lamang mabatyagan ang kalipay kag kasadya sa pagsaulog sang Paskwa.
Ini kasunod sang nagkalain-lain nga reaksyon sang publiko sa iya nauna nga pahayag may kaangtanan sa paghatag sang pagkaon para sa isa ka libo ka kabataan.
Sa iya pagpaathag, ginpahayag ni Tamayo nga indi kinahanglan nga maghanda sang sobra kadaku bangud mahimo na nga igo ang isa ka kilo nga baboy, isa ka kilo nga manok ukon isa ka kilo nga isda, depende sa gusto kag kapasidad sang tagsa ka pamilya.
Dugang pa sang gobernador, wala man kinahanglan nga magpabugal ukon magpakita sang bongga nga handaan, ilabi na kon indi ini masarangan sang pinansyal nga kahimtangan sang pamilya.
Suno sa iya, mas may importansya ang presensya sang mga miyembro sang pamilya nga nagatipon-tipon, nagakaon sing tingob kag nagapaambit sang kalipay sa pagsaulog sang kaadlawan sang pagkatawo ni Hesukristo.
Ginpahanumdom man niya nga ang Pasko indi dapat nakabase sa kadakuon sang handaan ukon kadamuon sang pagkaon, kundi sa paghigugmaanay, pagbinuligay kag pag-isa sang bug-os nga pamilya.
