Nagpasaka sang protesta ang gobyerno sang France batok sa Iran matapos ini mag-akusar nga ang Islamic Revolutionary Guard Corps (IRGC) ang responsable sa cyberattack nga nagtarget sa mga cooling system sang mga supermarket sa pungsod.
Suno kay French Foreign Minister Jean-Noël Barrot, gintawag niya nga wala pa sang kapareho ang kadakuon kag kabaskog sang pag-atake, kag ginpasalig nga may kaangay nga sanksyon nga ipatuman batok sa mga responsable.
Nahibaluan nga sang Oktubre 11, nakontrol sang mga hacker ang software nga nagadumala sang temperatura sang mga refrigerator kag freezer sa masobra 280 ka supermarket branches sang Coopérative U, Intermarché kag Netto.
Bangud sini, naglab-ot sa 50 degrees Celsius ang temperatura sang pila ka freezer, nga nagresulta sa pagkaguba sang madamo nga frozen food products.
Ginpatawag na man sang France ang embahador sang Iran sa Paris agud ipahayag ang ila protesta, samtang nagbukas na sang imbestigasyon ang mga prosecutor batok sa mga opisyal sang cyber unit sang IRGC.
Apang, ginpangiwala sang pila ka Iranian media outlets ang mga alegasyon kag ginlaragway ini nga wala sang basehan.
