Wala gid nakapangandam ang isa ka lalaki sa Mexico sa pinakadako nga sorpresa sang iya kabuhi matapos mahibaluan nga ang ginahunahuna niya nga ordinaryo nga family gathering sang iya nobya amo gali ang ila kasal!
Si Hector ang gin-agda sang iya nobya sa isa kuno ka pagtililipon sang pamilya.
Wala siya sing ideya nga may mas dako nga selebrasyon nga nagahulat sa iya.
Nag-abot si Hector nga naka-polo shirt kag maong, nga daw preparado lang magkaon kag makigkumustahan sa mga paryente.
Pero pag-abot niya, sa baylo nga lamesa sang pagkaon ang iya makita, masbra sa 150 ka bisita kag altar ang naghulat sa iya!
Mas natingala pa gid siya sang makita ang iya nobya nga nakasuksok na sang wedding gown kag preparado na para sa seremonya.
Sa baylo nga magpalagyo ukon magpangita anay sang formal nga bayo, ginpadayon ni Hector ang kasal kag ginpakaslan ang iya nobya.
Sa ulihi, nangin bana siya nga naka-polo shirt kag maong!
Siguro isa ini sa mga kasal nga wala kinahanglan sang RSVP, kay ang imbitasyon simple lang: family gathering.
Ang wala lang ginsugid, may libre gali nga lifetime commitment!
