Ginapaubaya na sang House Prosecution panel sa Senate Impeachment Court kag local court ang desisyon kun mahimo nga magpadayon sang dungan ang impeachment kag criminal case batok kay Vice President Sara Duterte.
Suno kay House Legal Spokesperson Benjamin Tolosa Jr., ginrespeto sang House panel ang desisyon sang mga korte kun pagapaboran ang argumento sang kampo ni Duterte nga indi na dapat magpadayon ang criminal case samtang nagapadayon ang impeachment complaint.
Nag-ugat sa ginpahayag nga pagpamahog ni Duterte batok kay President Ferdinand Marcos Jr., First Lady Liza Araneta-Marcos kag Rep. Martin Romualdez sang Nobyembre 2024.
Ini kabahin man sang mga basehan sang impeachment complaint batok sa bise presidente.
Suno kay Tolosa, lain ang liability kag quantum of evidence nga ginapangita sa impeachment kag criminal proceedings apisar pa magpadayon ini sing dungan.
Samtang, nagapahayag ang kampo ni Duterte nga magahain sila sang manifestation agud iduot ang oral arguments sa motion to quash, bangod mahimo ini maghatag sang dako nga epekto sa iban pa nga impeachable officials.
Ginpahayag man ni Tolosa nga indi dapat magpatuman sang bug-os nga gag order sa duha ka panig bangod mahimo ini maghatag sang kahigayunan sa paglapta sang fake information, ilabi na online.
