Wala na ginsangkatan sang sanction sang Women’s Tennis Association (WTA) ang Filipina tennis star nga si Alex Eala matapos niya pilion nga magrepresentar sa Pilipinas sa 20th Asian Games sa baylo nga mag-upod sa WTA 1000 China Open.
Suno kay Philippine Tennis Association (Philta) Executive Director Tonette Mendoza, ini ang iya ginpahayag sa ginpatigayon nga pagdinig sang Senate Committee on Sports.
Sa idalom sang nagligad nga WTA rules, mahimo kuntani nga multahan si Eala sang $10,000 kag kuhaan sang ranking points bangud obligado ang mga manlalaro nga magtambong sa amo nga torneo.
Apang ginkonsiderar sang WTA ang handum ni Eala nga makakuha sang direkta nga slot para sa 2028 Los Angeles Olympics paagi sa iya pagrepresentar sa Pilipinas.
Bangud sini, nagpatuman man ang WTA sang bag-o nga mga probisyon nga nagahatag proteksyon sa mga tennis player nga nagapili nga magrepresentar kag magserbisyo sa ila kaugalingon nga pungsod sa mga international competition.
Sa subong, nagapahuway anay si Eala antes magbalik sa kompetisyon sa WTA 1000 Wuhan Open sa China, nga natalana nga ipahigayon halin Oktubre 12 tubtob 18.
Ang desisyon sang WTA nagahatag kay Eala sang kahigayunan nga mapadayon ang iya kampanya sa international tennis samtang nagapabilin ang iya oportunidad nga makabulig kag makarepresentar sa Pilipinas sa mga mayor nga kompetisyon.
