Wala nadayon ang ginapaabot nga arraignment ni Vice President Sara Duterte sa Quezon City Regional Trial Court Branch 98 sang alas-8:00 sang aga, may kaangtanan sa tatlo ka kaso nga grave threats.
Sa arraignment, kuntani pormal nga basahon kay Duterte ang mga kaso nga ginpasaka batok sa iya kag pangayuon ang iya plea kon guilty ukon not guilty sa mga alegasyon. Apang, wala ini nadayon sa natalana nga tion.
Naghalin ang mga kaso sa reklamo sang Department of Justice (DOJ) nga pormal nga ginpasaka sang Agosto.
May kaangtanan ini sa mga pahayag ni Duterte sa online press conference sang Nobyembre 2024 parte sa iya ginsiling nga pagkuha sang hitman batok kay Presidente Ferdinand Marcos Jr., First Lady Liza Araneta-Marcos kag anay House Speaker Martin Romualdez, kon may matabo sa iya.
Ginpanginwala naman ni Duterte ang mga alegasyon.
Una na nga ginpaliban ang arraignment sang Setyembre 11 antes ini liwat nga natalana nga ipahigayon.
Sang Setyembre 5, nagbayad si Duterte sang piyansa nga P120,000 para sa kada kaso matapos magpagwa ang korte sang arrest warrant batok sa iya.//Ang kaso nga may kaangtanan sa ginapahayag nga pagpamahog kag pagpanghikot batok sa mga opisyal lakip man sa mga isyu nga ginatalakay sa impeachment trial ni Duterte sa Senado.
