Nagpahanumdom liwat ang pamunuan sang Department of Agriculture (DA) sa publiko nga maghalong sa pagbakal sang mga smuggled nga sibuyas nga posible magdala sang peligro sa ikaayong-lawas.
Ginhimo sang ahensya ang pahibalo matapos nagpositibo sa E. coli ang sample sang ilegal nga sibuyas nga nakuha sa ginpatigayon nga operasyon sa Paco Public Market sa Maynila sang nagligad nga semana.
Una na nga ginmanduan ni DA Secretary Francisco Tiu Laurel Jr. ang pagkumpiska sang amo nga produkto bangud nga ini smuggled kag posible man nga naglapas sa Food Safety Act of 2013.
Tungod sini, ginmanduan man sang ahensya ang Bureau of Plant Industry kag iban pa nga mga yunit sang ila departamento nga tutukan ang pagmonitor sang mga smuggled nga sibuyas sa mga merkado sa bug-os nga pungsod, labi na gid sa Metro Manila.
Ginpabutyag sang tiglikom nga ang tanan nga daku nga sibuyas nga makita sa palengke subong ilegal nga ginpasulod sa pungsod, bangud nga temporaryo nila gin-untat ang pag-issue sang import clearance para sa amo nga produkto.
Nangayo man ang DA sang bulig halin sa PNP agud dakpon ang mga tawo nga responsable sa pagpasulod sang smuggled nga sibuyas sa Pilipinas.
Ini nga tikang sang ahensya ang kabahin sang mando ni Presidente Ferdinand Marcos Jr. nga dakpon ang tanan nga apektado sa agricultural smuggling agud maprotektahan ang kita kag pangabuhi sang mga lokal nga mangunguma sa Pilipinas.
