Ginpanginwala sang Philippine Air Force (PAF) ang mga balita nga may naka-standby nga eroplano sa Villamor Air Base agud dal-on si Senador Ronald “Bato” dela Rosa pa-Hague.
Suno kay PAF Spokesperson Col. Ma. Consuelo Castillo, normal lang ang operasyon sa air base kag wala sang opisyal nga direktiba nga nadawat ang militar bahin sa sini nga isyu.
Sa subong, ara sa “white alert” status ang PAF, nga nagakahulugan nga padayon ang normal nga air kag security operations.
Ginpabutyag man ni Col. Castillo nga wala sang koordinasyon nga nagakatabo sa PAF ukon AFP para sa posible nga pagdala sa senador sa International Criminal Court (ICC).
Ini nga klaripikasyon nagasabat sa pahayag ni Atty. Israelito Torreon, abogado ni Dela Rosa, nga may ginahanda nga aircraft kag composite team halin sa PNP para arestuhon ang senador.
Samtang sina, ginpanginwala man ni AFP Public Affairs Chief Col. Xerxes Trinidad ang mga nagalapta nga litrato sang Gulfstream aircraft sa online.
Suno sa iya, “inaccurate” ang impormasyon kag ang mga litrato halin sa mga nagliligad nga insidente.
Ginhangyo man niya ang publiko nga likawan ang pagpanglapta sang mga balita nga wala pa beripikado.
