KORONADAL CITY – Yara na sa kustodiya sang kapulisan sa President Roxas, Cotabato ang isa ka construction worker matapos nga magpalupok sang armas kadungan sang ginaaligar nga pagmaoy sini.
Ginkilala ang naaresto nga si Arjay Maninggo Tabian, 27, anyos, single kag residente ng Brgy. Baniwag, Kabacan Cotabato.
Suno sa kapulisan, isa ka konsehal ang nagreport sa otoridad angot sa asod-asod nga lupok nga ila nabatian gikan sa nagmaoy nga suspek.
Gilayon naman nga nagpatigayon sang imbestigasyon ang kapulisan kag natukiban ang ginhimo ni Tabian.
Nakumpiska sa posisyon sang suspek ang isa ka (1) unit Smith and Wesson cal. 38 revolver nga wala sang Serial Number, nga loaded sang tatlo ka (3) live ammunitions sang cal. 38, revolver.
Magapangatubang naman sang kaso nga paglapas sa RA 10591 ukon ang “Comprehensive Firearms and Ammunition Regulation Act” ang suspek.
