KORONADAL CITY – Ginauyatan na sang kapulisan ang CCTV footage sa pagpaniro-patay sa isa ka lending collector nga gin-agawan sang motorsiklo kag koleksiyon nga kwarta sa siyudad sang Tacurong sang nagligad nga gab-i.
Ginkilala ni Pol.Lt. Col. Bryan Bernardio, hepe sang Tacurong City PNP ang biktima nga si Danel Hope Baclaan Suelo, 28 anyos, kag residente sang Barangay Caloocan, Koronadal city.
Suno kay Bernardino, nagluntad ang insidente sa bahin sang Barangay Road, Purok San Martin, Barangay Calean, sa nasambit nga siyudad.
Naguwa sa imbestigasyon sang mga otoridad nga halin sa Lambayong kag Isulan ang biktima kag ulihi na kuntani sini nga rota ang Tacurong antes e-remit ang collection sa ila opisina sa siyudad sang Koronadal apang natabo ang pagpangluthang sa iya.
May gin-agyan nga ulihi nga kliyente ang biktima kun diin ginkuha sini sa tindahan ang booklet kag sang nag nagbalik sa nakaparking nga motorsiklo sini ginbantayan siya sang gunman kag makapila ka bes nga gintiro.
Sa kuha sang CCTV Camera sa lugar, nahibaluan nga duha ang nakamotorsiklo nga kalalakihan ang nagsunod sa biktima sang nag-abot sa lugar kag isa sa mga angkas ang nanaug kag nakita nga nagtiro sa iya.
Nahibaluan nga empleyado sang Eleven 28 Lending ang biktima nga nag-angkon sang apat ka igo sang bala sa dughan kag kili-kili.
Hold-up kag motornapping naman ang anggulo nga ginalantaw sang kapulisan sa hitabo.
Sa karon, padayon nga nagasinggitan sang hustisya ang pamilya sang biktima sa kamatayon sini.
