Gin-aprobahan na sang House Committee on Energy ang hgna nga nagatinguha nga kakason ang system loss charge sa bayranan sa kuryente.
Sa idalom sang nasambit nga hagna, indi na ipasa sa mga konsyumer ang mga gasto nga resulta sang inefficiency kag non-technical losses sa sistema sang distribusyon sang kuryente.
Dugang pa diri, ginatinguhaan man sang hagna nga mapalapad ang paggamit sang kaugalingon nga power generation system sa mga panimalay.
Madumduman nga ginmentionar ni Presidente Ferdinand Marcos Jr. sa iya State of the Nation Address (SONA) ang sini nga tikang bilang isa sa mga prayoridad nga nagakinahanglan sang legislative action agud masolusyunan ang mataas nga presyo sang kuryente sa pungsod.
Kaangot sini, nagtukod man ang Department of Energy (DOE) sang inter-agency task force agud mapadasig ang pagplano kag pagpatuman sang nasambit nga tikang.
Gin-aprobahan man sa amo nga hearing ang separado nga ginaproponer nga hagna nga “Sariling Kuryente Act.”
Tumong sini nga padasigon ang pagbutang kag paggamit sang solar power kag energy storage systems sa mga panimalay agud mabuligan ang mga pumuluyo nga makatipig kag maminusan ang ila pagsalig sa power grid.
Kun mapasar kag mangin bug-os nga hagna, pagabag-uhon sini ang Republic Act No. 9136 ukon ang Electric Power Industry Reform Act (EPIRA), nga nagasakop sa reporma sa industriya sang kuryente sa Pilipinas.
