Ginpasiguro sang Bureau of Fire Protection (BFP) South Cotabato nga preparado kag husto ang pagbansay sang ila mga personnel para sa madasig kag episyente nga pagresponde sa bisan ano nga insidente sa ginapaabot nga pagsaulog sang T’nalak Festival 2026.
Sa interview sang Bombo Radyo Koronadal, ginpahayag ni SFO1 Rodrigo Peralta Jr., Deputy Planning for Safety sang BFP South Cotabato, nga padayon ang ila preparasyon agud masiguro ang kaluwasan sang publiko sa tion sang mga aktibidad sang selebrasyon.
Suno kay Peralta, ginatan-aw sang ila ahensya ang kaandam sang mga fire personnel, lakip na ang ila training kag mga kinahanglanon, agud makahatag sang husto nga responde kin may emerhensiya.
Ginsiguro sang BFP nga magapadayon sila sa pagmonitor kag pagpakig-angot sa mga may katungdanan para sa malinong kag luwas nga pagselebrar sang T’nalak Festival 2026.
