KORONADAL CITY – Suspendido ang isa ka konsehal sa banwa sang Banga, South Cotabato matapos mabuyagyag nga benepisaryo ini sang Pantawid Pamilyang Pilipino Program ukn 4Ps program sang gobyerno.
Ini ang ginkumpirmar sang Bombo Radyo Koronadal ni Barangay Kapitan Elpedio Patarata sang Barangay San Vicente sa nasambit nga banwa sa interview sang Bombo Radyo.
Ginkilala ang konsehal nga si Brgy. Kagawad Dexter Donasco nga nagserbe sang konsehal sang barangay humalin sang 2013 tubtob sa kasamtangan.
Suno pa kay Kapitan Patarata, 2009 pa benepisaryo na si Donasco rason nga sang nagdaug ini sa eleksiyon, ginpadulungan suno pa ini sang DSWD screening committee agud nga i-wave ang pagka-myembro sang 4Ps apang wala sini ginhimo.
Tubtob sa subong nagabaton pa sang benepisyo gikan sa programa sang gobyerno ang nasambit nga opisyal sang barangay.
Bangud sa wala pagsunod ni Donasco sa hingyo nga i-waive sini ang iya nga benepisyo , ginpasakaan ini sang kaso nga administratibo sa Ombudsman sang mismo nga Kapitan sang barangay.
Magluwas sini, nagsumiter man sang resolusyon ang Barangay Council sa Sangguniang Bayan sang Banga kag sini lamang bulan sang Hulyo nagpaguwa ang Quasi-Judicial body sang 19th Sanggunian sang desisyon nga nagasuspender sa sulod sang duha ka bulan sa konsehal.
Napamatud-an suno pa nga ginlapas ni Nolasco ang letter a and c sang section.4 on Norms and Conduct of Public Officials and Employess of RA 6713 kag overtly committing Gross Dishonesty provided letter c, Section 60 Chapter 4 book 1 of Local Government Code of 1991 ukon RA 7160.
Nanindugan man si Kapitan Patarata nga apisar himata sini ang konsehal, indi siya magduha-duha sa pagpasaka sang kaso Ombudsman.
Kadungan sini, nagpanawagan man ang opisyal sang Barangay kay DSWD Secretary Erwin Tulfo nga limpyuhan ang listahan sang mga benepisaryo sang 4Ps bangud madamo ang indi qualified.
