KORONADAL CITY – Matigdas nga ginpanginwala ni Punong Barangay Danilo Delos Santos sang Barangay General Paulino Santos (GPS) ang mga alegasyon sa reklamo nga ginpasaka batuk sa iya sa Sangguniang Panlungsod sang Koronadal.
Base sa dokumento nga nabaton sang “Quasi-Judicial Body” sang Sangguniang Panlungsod sining Mayo 5, 2026, si Delos Santos ang ginkasuhan nanday Alyas Ann, Alyas Don, kag pito (7) pa ka iban pa.
Ang mga reklamo nga ginapangatubang sang sini amo ang mga masunod:
- Paglapas sang Provincial Ordinance No. 1, Series of 2016
- Misconduct (Indi husto nga pamatasan sa opisina)
- Abuse of Authority (Pag-abuso sa gahum)
Sa isa ka eksklusibo nga interview sang Bombo Radyo, gin-athag ni Kapitan Delos Santos nga wala sang kamatuoran ang mga akusasyon. Suno sa iya, wala siya sang gin-manipular ukon ginpangunahan nga eleksyon sa mga purok, kag indi man matuod nga ginapunggan niya ang pagpatigayon sang eleksyon sa iban pa nga mga area.
Ginsiguro man sang opisyal nga wala ini nagpasilabot ukon nag-entra man lamang sa proseso sang eleksiyon sa Kapurukan labi na sa mga Purok kasubong sang Masagana, Pag-asa, Matulungin, Bagong Sikat, Kings 1 kag iban pa .
Sa pihak sang mga isyu, ginaawhag ni Delos Santos ang iya mga constituents nga kon may yara sang problema ukon concern sa ila mga Purok President, magdangup lang sa iya opisina sa Barangay Hall agud ini mabuligan.
Sa subong, nakahanda ang kapitan nga sabton ang tanan nga punto sang reklamo sa tion nga pagatalakayon na ini sang Sangguniang Panlungsod agud magguwa ang kamatuoran.
