Tumutok ang usapin sa kalagayan ng pondo ng bansa matapos igiit ni Sara Duterte na tila kapos na ang pondo ng pamahalaan, batay umano sa isang memorandum mula sa Department of Budget and Management na nag-uutos sa mga ahensya na bilangin ang kanilang savings.
Sa isang panayam noong Mayo 5, sinabi ng Bise Presidente na “wala na” ang pondo ng bansa, kasunod ng tanong ng isang OFW hinggil sa estado ng ekonomiya. Aniya, maging ang Office of the Vice President ay inatasang tukuyin ang natitirang pondo—isang indikasyon, ayon sa kanya, ng masikip na fiscal situation.
Ikinabit din ni Duterte ang isyu sa mas malawak na pressure sa ekonomiya, kabilang ang pagtaas ng presyo ng langis, paghina ng piso, at inflation—isang “triple whammy” na aniya’y direktang nagpapahirap sa mga Pilipino.
Gayunman, agad itong kinontra ng Malacañang. Sa panig ng administrasyon ni Ferdinand Marcos Jr., iginiit na nananatiling matatag ang mga programang pang-ekonomiya at tuloy-tuloy ang ayuda sa iba’t ibang sektor.
Ayon kay Palace Press Officer Claire Castro, may umiiral na mga hakbang tulad ng fuel subsidies, TUPAD emergency employment, at UPLIFT initiative para sa mga apektadong sektor, kabilang ang transport workers at OFWs. Binanggit din niya ang naunang direktiba ng Pangulo para sa repatriation at suporta sa mga OFW sa gitna ng tensyon sa Gitnang Silangan.
Hindi rin pinalampas ng Palasyo ang puna laban sa Bise Presidente, na iniuugnay ang kanyang mga pahayag sa madalas umano nitong biyahe sa ibang bansa—na maaaring dahilan, ayon kay Castro, kung bakit hindi nito lubos na nakikita ang implementasyon ng mga programa ng gobyerno.
Samantala, nasa The Hague si Duterte upang bisitahin ang kanyang ama na si Rodrigo Duterte, na kasalukuyang nahaharap sa kaso sa International Criminal Court kaugnay ng crimes against humanity.
