Nagpanindugan ang defense team ni VP Sara Duterte nga ang “probable cause” nga nakita sang House Justice Committee sa duha ka impeachment complaints indi nagabuot-silingon nga “guilty” na ang Bise Presidente.
Ginpahayag ni Atty. Michael Poa, spokesperson sang defense panel, ginpabaskog niya nga ang pagkakita sang probable cause nagabuot-silingon lang nga ginpili sang mga miyembro sang komite nga ipadayon kag i-transmit ang kaso sa plenaryo.
Suno sa iya, indi ini nagapakita sang sala ukon liability sang Bise Presidente, kundi isa lang ka tikang sa proseso sang impeachment.
Indi na man ini nakakibot para sa kampo sang Bise Presidente, bangud ginapaabot na nila nga ipadayon ang kaso sa full trial sa Senado.
Sa pihak nga bahin, ginapabilin sang defense team nga indi angay kag indi legal ang mga ginpatigayon nga hearing sang justice panel sa impeachment case.
Maduduman nga naglab-ot sa apat ka hearing antes magbotar ang komite kag makitaan sang probable cause ang duha ka reklamo batok kay VP Sara.
Suno kay Poa, ginapadayon sang panel ang ila posisyon kag ginpaabot na man ini sa Korte Suprema paagi sa petisyon agud ipauntat ang hearing sang impeachment batok sa Bise Presidente.
