Ginpabutyag sang Punong Barangay sang Barangay GPS nga kasamtangan pa sila nga nagahulat sang permanente nga rehabilitasyon halin Department of Public Works and Highways (DPWH) sa naguba nga drainage system sa Purok Kaugnayan, Koronadal City bangud indi na ini nakasarang sa kadakuon sang agos sang tubig.
Sa interview sang Bombo Radyo Koronadal kay Barangay Captain Danilo Delos Santos, ginpahayag niya nga ang culvert nga nagakonektar sa Channel 3 pakadto sa Marbel River amo ang apektado sang pagkahuyang bangud sa mabaskog nga pag-ilig sang tubig.
Suno sa iya, nagpadala na ang City Government sang backhoe para sa temporaryo nga aksyon, apang napunggan ang operasyon bangud sang pagtiphag sang duta kag mga sanga sang kahoy nga nagbalabag sa alagyan.
Bangud sa nagapadayon nga problema, ginatan-aw sang barangay ang posibilidad sang pagpabakwit sang mga residente sa Purok Kaugnayan kun maglala pa ang sitwasyon, ilabi na kun magpadayon ang mabaskog nga pag-ulan.
Ginapadayon man sang barangay ang monitoring sa iban nga apektado nga kasubong sang Purok Masagana, samtang nagahulat sang mas malawig nga solusyon sa drainage problem.
