Ginhatagan sang Philippine Red Cross South Cotabato Chapter sang dako nga importansya ang pagdonar sang dugo bilang isa ka simple apang mabakod nga paagi sa pagluwas sang kabuhi.
Sa interview sang Bombo Radyo Koronadal, ginpahayag ni Erwin Rommel Del Carmen, RMT, administrator sang Philippine Red Cross South Cotabato Chapter, nga ang dugo isa ka importante nga bahin sang pagluwas sang kabuhi, ilabi na para sa mga pasyente nga nagakinahanglan sang blood transfusion bangud sa emerhensya ukon nagkalain-lain nga medikal nga kondisyon.
Kaangot sini, ginpabutyag ni Del Carmen ang ila mabaskog nga suporta sa palaabuton nga Dugong Bombo 2026, nga pangunahan sang Bombo Radyo kag Star FM sa Nobyembre 14, 2026.
Ginawhag niya ang publiko nga magtambong kag magpartisipar sa amo nga aktibidad kag maghatag sang dugo.
Suno sa iya, ang isa ka blood donation mahimo mangin daku nga bulig sa mga pasyente nga nagakinahanglan sang dugo kag mahimo makabulig sa pagluwas sang kabuhi.
Ginpabug-atan man ni Del Carmen nga importante ang padayon nga pagdonar sang dugo agud may yara sang sapat nga suplay para sa mga ospital kag mga pasyente nga mahimo magkinahanglan sini sa tion sang emerhensya.
