Gin-agda ni Bacongco National High School Street Dancing Coordinator Devon John Gomez ang mga pamatan-on nga padayon nga hakson ang ila talento kag mangin kabahin sa pagpreserbar sang lokal nga kultura pinaagi sa street dancing, suno sa iya, ini ang isa sa mga leksyon nga ginbilin sang katatapos lang nga T’nalak Festival 2026.
Sa interview sang Bombo Radyo Koronadal, ginpahayag ni Gomez nga ang mensahe ginpabakod sang makasaysayan nga kadalag-an sang Bacongco National High School, nga nangin una nga grupo nga nakaangkon sang ikaapat nga sunod-sunod nga kampeonato sa Kadsagayan A Lalan (Street Dancing) Competition.
Suno sa iya, ang four-peat championship resulta sang mabaskog nga preparasyon, disiplina, kag eksperyensya sang mga performers, lakip ang pagbinuligay sang administrasyon, mga ginikanan, kag mga nagsuporta sa grupo.
Luwas sa titulo bilang kampeon, nakuha man sang Bacongco National High School ang Best in Street Parade, nga nagdugang pa sa ila mga kadungganan sa katatapos lang nga festival.
