Maisog nga ginsabat ni Bise Presidente Sara Duterte ang mga mambabatas nga nagsaway sa iya, kag ginpanawagan sila nga “mga produkto sang warlordismo” sa pulitika sang Pilipinas.
Ginatumod sang Bise Presidente sanday Lanao del Sur Rep. Zia Alonto Adiong kag House Deputy Majority Leader Paolo Ortega V. Una nga gin-akusar ni Adiong si VP Duterte nga nagapadayon sang “shame campaign” kag gin-awhag siya nga ibalik ang “disente nga kampanya.”
Si Ortega naman nagpamangkot sa katapatan ni Duterte sa pungsod bangud sa iya katahimikan sa isyu sang pag-agaw sang teritoryo sang China.
Dugang pa niya, pareho lang si Cong. Ortega kay Cong. Adiong mga produkto man sang warlordismo sa pungsod. Gani para sa iya, mas maayo nga maguntat na lang sila.
Ginpahayag man sang Bise Presidente nga wala siya sang rason nga atakehon ang China samtang nagapangampanya siya sa sulod sang Pilipinas.
Nagapadayon ang banggaan sa tunga ni Duterte kag sang mga kongresista matapos ang mga alegasyon sang masamî nga paggamit sang pondo sa Department of Education kag Office of the Vice President.
Naglala pa gid ang tensyon sang gin-aprobahan sang Kamara ang impeachment kay Duterte sang Pebrero 5; subong nakabinbin pa ang paglilitis sa Senado.
