Padayon ang Koronadal City Traffic Management Division (CTMD) sa regular nga clearing operations batok sa illegal parking kag mga salakyan nga nagabalabag sa dalanon, samtang ginatukod man ang dugang nga parking area malapit sa isa ka dako nga Mall agud maminusan ang paghuot sang trapiko sa downtown area.
Sa interview sang Bombo Radyo Koronadal ginpahayag ni Joy Placer, head sang Koronadal City Traffic Management Division, nga lakip sa ila ginamonitor ang mga tricycle, motorsiklo kag four-wheel vehicles nga nagapark sa pedestrian lanes kag mga lugar nga may no-parking signs, partikular sa palibot sang mga mall nga madamo ang nagakadto nga motorista kag naga-agi sa pedestrians.
Ginpahayag ni Placer nga may mga motorista nga nagapabilin sing pila ka oras sa mga parking area, nga nagadugang sa kakulang sang espasyo kag kabudlayan sa dalagan sang trapiko.
Ginhatagan pagtamod ni Placer, nga may P500 nga multa ang paglapas sa traffic signs kag illegal parking nga nagresulta sa obstruction. Kinahanglan man nga mabayaran anay ang nagakaigo nga multa kag obligasyon antes makuha liwat ang ginguyod nga salakyan.
Samtang, ginapaathag ni Placer nga nagahatag anay sang warning sa pila ka kaso bangud limitado ang kapasidad sang towing equipment kag agud malikawan ang pagkadamage sang mga salakyan.
Nagapanawagan ang CTMD sa mga motorista nga gamiton ang natalana nga parking spaces, sundon ang traffic signs kag indi pag-okuparan ang pedestrian lanes agud malikawan ang multa, obstruction kag disgrasya.













