Nagapanawagan ang isa ka traysikol driver sa lokal nga gobyerno sang Koronadal nga magtalana sang mga otoridad nga magabantay sa mga gasolinahan agud masiguro ang husto nga pagpatuman sang oil price rollback kada Martes.
Sa interview sang Bombo Radyo Koronadal, ginpahayag ni Boy Fajugatana, traysikol driver sa syudad, nga iya natalupangdan nga may pila ka gasolinahan nga wala nagasunod sa natalana nga oras kag adlaw sang pagpatuman sang pagnubo sang presyo sang petrolyo.
Suno kay Fajugatana, nagahatag ini sang epekto sa ila pangabuhian, ilabi na sa mga traysikol driver nga may kinaandan na nga gasolinahan nga ginapadulungan agud magpatubil sang gatong.
Bangud sini, ginapangabay niya ang lokal nga gobyerno nga mag-deploy sang mga personnel nga magamonitor sa mga gasolinahan agud masiguro nga nagasunod ang mga ini sa nagakaigo nga schedule sang oil price adjustments kag sa nagapatuman nga mga regulasyon.













