-- ADVERTISEMENT --

Ginpahayag ni Barangay Kagawad Bobby Castillo sang Barangay Concepcion, Syudad sang Koronadal, nga indi residente sang ila barangay ang lalaki nga napatay sa operasyon sang Criminal Investigation and Detection Group (CIDG) sa Purok Roxas.

Sa interview sang Bombo Radyo Koronadal ginpahayag ni Castillo, nga duha ka bulan pa lamang nga nagatinir sa lugar ang napatay nga persona nga ginkilala nga si Ricky Gayan Malo alyas “Bangus,” nga ginaalegar nga naghalin Davao City.

Si Malo isa ka regional-level most wanted person nga may ginapangatubang nga kaso nga Murder kag Attempted Murder base sa warrant of arrest nga ginpagwa sang Regional Trial Court Branch 37 sa General Santos City sang Enero 6, 2026. Suno sa Koronadal City Police Station, ginaalegar nga nagbato ang suspek sa pagserbe sang warrant kag nagkuha sang kalibre .45 nga pistola nga nakasuksok sa iya hawak, rason nga nagpalupok sang iya service firearm si PMSg Isidro O. Elias Jr.

Nga nagresulta sang tatlo ka igo sang bala ang naangkon ni Malo kag gindala gilayon sa Provincial Hospital of South Cotabato, apang gindeklarar nga dead on arrival. Samtang, napilasan man ang iya kaupod nga si Fritzel John Sinsua Malo matapos maigo sa tuo nga bahin sang likod.

Yara ini sa stable nga kondisyon sa Allah Valley Medical Specialist Center, Inc. Samtang narekober sa lugar ang kalibre .45 nga pistola nga may unom ka bala sa magazine kag isa ka bala sa chamber. Nagapadayon ang imbestigasyon sang mga otoridad agud maestablisar ang bug-os nga sirkumstansya sang insidente.