-- ADVERTISEMENT --

Nagapabilin sa P700 kada semana ukon P100 kada adlaw ang budget ni Martin Buscagan, isa ka traffic enforcer sa Koronadal City, para sa gasolina apesar padayon ang pagbag-o-bago sang presyo sang gatong.

Sa interview sang Bombo Radyo Koronadal ginpahayag ni Buscagan, ginapaninguhaan niya nga tipiron ang iya adlaw-adlaw nga galastuhon agud may bastante nga gasolina para sa iya pag-duty kag indi maapektuhan ang iban niya nga kinahanglanon.

Sa pihak nga bahin iya ginpabutyag nga ang P96 nga minimum daily food budget kada indibidwal, ginakabig niya nga posible ini nga masigo kon kan-on lamang ang basehan, apang mahimo nga kulang para sa mga may mas daku nga kinahanglanon sa pagkaon.

Sa katapusan iya ginapanawagan sa mga gasolinahan nga mangin patas kag husto sa pagpatuman sang fuel price adjustments, ilabi na sa mga rollback, agud mabatyagan sang mga motorista ang benepisyo sang pagpanubo sang presyo sang gatong.