Madinalag-on nga ginpatigayon sang Philippine Red Cross (PRC) South Cotabato Chapter ang bloodletting activity sa KCC Mall of Marbel Event Center, fourth floor, sa Koronadal City, nga may target nga 200 ka blood units.
Sa interview sang Bombo Radyo Koronadal, ginpahayag ni Shirley Estante, Blood Donor Recruitment Officer sang PRC South Cotabato, ang kada unit may 450 milliliters nga dugo kag mahimo makaluwas sang tubtob tatlo ka kabuhi.
Ginpahayag ni Estante nga kwalipikado magdonar ang mga nagaedad 18 tubtob 65 anyos, samtang ang 16 tubtob 17 anyos kinahanglan may written parental consent.
Mahimo man makadonate ang mga nagatumar sang maintenance medicines pareho sang Amlodipine kag Bisoprolol, kag mga diabetic nga kontrolado ang kondisyon kag wala nagagamit sang injectable insulin, basta makapasar sa medical assessment.
Ginpahanumdom man niya ang mga donors nga dapat maayo ang kondisyon sang lawas, wala sing hilanat ukon balatian, igo ang tulog kag naglikaw sa makahulubog nga ilimnon antes magdonar.
Samtang, ginpasiguro sang PRC nga ginapaidalom sa serological testing ang nakolekta nga dugo antes ini gamiton sa blood transfusion.
Nakabaton man ang mga successful donors sang refreshments kag free T-shirt bilang pagkilala sa ila boluntaryo nga kontribusyon sa pagluwas sang kabuhi.
