Nagpanawagan si Koronadal City Mayor Erlinda “Bing” Araquil sa mga motorista nga mangin mas responsable kag mahalong sa pagdrayb, kasunod sang aksidente nga naulamid sa police personnel kag isa ka menor de edad nga bata sa syudad.
Suno kay Araquil, nagakasubo ang lokal nga panguluhan sa natabo nga insidente, apang kinahanglan anay hulaton ang resulta sang imbestigasyon sang Philippine National Police (PNP) agud matumod ang matuod nga rason kag mga sirkumstansya sa likod sang aksidente.
Ginpahayag man sang alkalde nga lain-lain ang bersyon sang duha ka panig nahangunod sa insidente, gani kinahanglan nga mangin patas kag maid-id ang pag-usisa.
Ginpasalig man sang Koronadal City PNP nga wala sang pagatabuon nga whitewash kag igafile ang nagakaigo nga reklamo base sa resulta sang imbestigasyon.
Ginpaandaman man ni Araquil ang tanan nga motorista nga maghalong gid, ilabi na sa downtown area, kag sundon ang pamaagi nga “stop, look and listen” antes magtabok ukon magpadayon sa pagdrayb.
Ginpanugyan man niya nga limitahan sa 30 tubtob 40 kilometers per hour ang kadasig sang mga salakyan sa sentro sang syudad agud malikawan ang kaangay nga mga trahedya.
Dugang pa sang alkalde, bukas ang City Government sa paghatag sang bulig sa pamilya sang biktima, lakip na sa menor de edad nga bata nga napatay sa aksidente.
