Layo man ang ila ginhalinan, wala ini nangin balabag sa apat ka boluntaryo nga blood donors halin sa Barangay Poblacion, Buluan, Maguindanao del Sur nga nagbiyahe pakadto sa Koronadal City agud makapakigbahin sa Dugong Bombo 2026 sang Bombo Radyo Koronadal.
Sa interview sang Bombo Radyo Koronadal, ginpahayag ni Nerwin Fallusco, isa sa mga donor, nga kinaandan na nila sang iya mga kaupdanan ang pagpartisipar sa nagkalain-lain nga bloodletting activities bilang paagi sang pagbulig sa mga nagakinahanglan sang dugo.
Suno kay Fallusco, temprano pa sila nagbiyahe halin Buluan agud makaabot sa aktibidad kag makahatag liwat sang dugo. Ginpaambit man niya ang iya kalipay nga mangin kabahin sang inisyatibo nga nagatinguha makabulig kag makaluwas sang kabuhi.
Gin-awhag man niya ang publiko nga magpakigbahin sa blood donation activities, bangud ang isa ka donasyon mahimo mangin dako nga bulig kag paglaum sa mga pasyente nga nagakinahanglan sang dugo.
Para kay Fallusco, indi kinahanglan mangin kilala ukon may espesyal nga ikasarang agud mangin baganihan, bangud paagi sa pagdonar sang dugo, may oportunidad ang kada isa nga makaluwas sang kabuhi sang isigkatawo.













