Wala nagauntat ang City Anti-Drug Abuse Council (CADAC) sang Koronadal City sa pagpatigayon sang nagkalain-lain nga programa agud mapabakod ang kampanya kontra ilegal nga droga, ilabi na paagi sa paghatag sang edukasyon kag pagpahibalo sa mga kabataan kag nagkalain-lain nga komunidad.
Sa interview sang Bombo Radyo Koronadal, ginpahayag ni Rey D. Calanao, CADAC Action Officer sang syudad, nga ang pagmonitor sang mga aktibidad nga may kaangtanan sa ilegal nga droga kag ang pagpatigayon sang mga operasyon amo ang katungdanan sang Drug Enforcement Unit.
Apang, ginpabutyag ni Calanao nga wala ini nagakahulugan nga wala na sang ginahimo ang ila nga talatapan sa kampanya kontra ilegal nga droga, bangud nagapadayon sila sa pagpatuman sang nagkalain-lain nga programa, proyekto kag mga hilikuton nga nagatumod sa pagpugong sa paglapta sang paggamit sini.
Dugang pa niya, indi lamang sa kadamuon sang mga nadakpan ukon sa mga operasyon dapat talupangdon ang pag-uswag sang kampanya kontra ilegal nga droga, kundi lakip man diri ang mga programa nga nagahatag sang nagakaigo nga ihibalo sa publiko tuhoy sa malain nga epekto sini.
Lakip sa mga ginapatigayon sang CADAC amo ang mga drug symposium sa mga eskwelahan kag nagkalain-lain nga komunidad, nga nagahatag sang pagtulun-an sa mga kabataan agud mas mahangpan nila ang peligro nga dala sang paggamit sang ilegal nga droga, ilabi na sa ila ikaayong lawas.
Ginpabug-atan man ni Calanao ang importansya sang pagbinuligay kag pagkoordinar sang ila talatapan sa mga eskwelahan kag mga manunudlo agud mapalapad pa ang paghatag sang edukasyon sa mga estudyante.
Nagapati ang opisyal nga paagi sa mas temprano nga pagpahibalo kag pagtudlo sa mga kabataan tuhoy sa malain nga epekto sang ilegal nga droga, mas mahimakas ang ila pagsikway sa paggamit sini kag malikawan nga mangin kabahin sila sang problema sa palaabuton.
