Ginapaabot nga maganubo ang presyo sang mga produktong petrolyo, ilabi na ang diesel kag kerosene, sa ikatlo nga semana sang Nobyembre.
Suno sa Jetti Petroleum, base sa apat ka adlaw nga pagbantay sa presyo sang langis sa world market kag foreign exchange rates, posible ang masunod nga pagnubo:
Diesel: ₱4 tubtob ₱5 kada litro
Gasolina: ₱3 tubtob ₱4 kada litro
Apang wala pa nalakip sa banabana ang pagbag-o sa galastuhan sa kargamento kag seguro.
Ang pagnubo sang presyo sang langis sa nagligad nga mga adlaw ginalakipan sang paglaum sa kasugtanan sa paghidait sang Estados Unidos kag Iran.
Apang, nagbalik ang pagsaka sang presyo bangud sa mga pagkatublag sa suplay sang langis, lakip ang mga pag-atake sa mga pasilidad sang enerhiya sa Saudi Arabia kag mga sakayan sa Strait of Hormuz.
