Nagpahayag sang pagkadismaya si Senador JV Ejercito sa mga Pilipino nga ginatudlo nga nagadepensa sa China sa social media sa tunga sang nagapadayon nga tensyon sa West Philippine Sea (WPS).
Sa iya pahayag sang Lunes, pagtapos sang pagtalakay sa Senado parte sa 2027 nga budget sang Department of National Defense, ginpabug-atan ni Ejercito nga masakit para sa pungsod nga may mga pumuluyo nga daw nagapabor sa iban nga estado sa mga isyu may kaangtanan sa interes kag soberanya sang Pilipinas.
Suno sa senador, dapat unahon sang mga Pilipino ang pagpanalipod sang kinamatarong sang ila kaugalingon nga pungsod, ilabi na samtang nagapadayon ang pag-angkon sang Pilipinas sa iya mga kinamatarong sa West Philippine Sea.
Ang iya pahayag nag-abot matapos ang nagainit nga pagbinayluhay sang mga pahayag sa tunga sang mga opisyal sang Pilipinas kag China. Nagsugod ini sa kontrobersyal nga komento ni Chinese Ambassador Jing Quan parte sa posibilidad sang pagdaog sang China kon maggamit ini sang puwersa batok sa Pilipinas, bisan pa sa iya paggiit nga gusto sang Beijing ang kalinong.
Bangud sini, nagdamo ang mga opisyal sang gobyerno kag mga senador nga nagpahayag sang ila pagkabahala kag nagpanawagan nga respetuhon ang Pilipinas kag ang mga kinamatarong sini sa West Philippine Sea.
Nagapabilin nga sensitibo nga isyu ang WPS bangod may kaangtanan ini sa teritoryo, seguridad sang pungsod kag pangabuhian sang mga Pilipino nga nagasalig sa pangisda. Padayon man nga ginapahayag sang mga opisyal sang Pilipinas ang importansya sang pagpanalipod sang pungsodnon nga interes sa tunga sang nagapadayon nga tensyon sa rehiyon.
