Ginpatawag sang Department of Foreign Affairs (DFA) si Chinese Ambassador Jing Quan agud ipahayag ang pagkabalaka sang gobyerno sang Pilipinas sa iya kontrobersyal nga komento bahin sa posibilidad sang paggamit sang puwersa batok sa Pilipinas sa West Philippine Sea (WPS).
Ginpahayag ni DFA Secretary Theresa Lazaro nga indi mabaton sang Pilipinas ang amo nga pahayag bangud mahimo ini magpagrabe sang tensyon kag makadula sang pagsalig sa tunga sang duha ka pungsod.
Suno sa iya, ang mga pahayag nga nagapakita sang posibilidad sang paggamit sang puwersa indi makabulig sa mga panikasog sang Pilipinas kag China nga mapauswag ang kooperasyon kag mapabilin ang malinong nga relasyon.
Nauna nga ginreport nga nagpahayag si Jing Quan nga mahimo madali nga magdaog ang China sa Pilipinas kun magdesisyon ini nga maggamit sang puwersa sa West Philippine Sea.
Ang iya komento nagdulot sang pagkabalaka kag pagpakamalaot halin sa pila ka opisyal sang gobyerno kag mga mamalidha sang Pilipinas.
Bangud sini, may mga mambabatas nga nagpahayag sang suporta sa pagdeklarar kay Jing Quan bilang persona non grata, ukon persona nga indi na ginakalipay nga magpabilin sa isa ka lugar ukon pungsod.
Apang, ang amo nga panawagan kinahanglan pa dumdumon suno sa nagakaigo nga proseso kag mga regulasyon.
Nagapabilin nga sensitibo ang relasyon sang Pilipinas kag China bangod sa nagapadayon nga indi pag-intiendihanay sa West Philippine Sea.
Ginapahayag sang Pilipinas ang pagpanalipod sang iya mga kinamatarong kag interes sa kadagatan, samtang nagapadayon ang mga panawagan nga maresolbar ang mga isyu paagi sa diplomasya kag malinong nga pag-istoryahanay.
