Hinimok ng Malacañang ang mga kritiko ni Pangulong Ferdinand Marcos Jr. na unawain muna ang kabuuang mensahe ng kaniyang pahayag tungkol sa paghahanda sa posibleng kakulangan sa tubig sa halip na pagtawanan ang payo nitong maghanda ng mga balde sa harap ng inaasahang Super El Niño.
Ayon kay Presidential Communications Office (PCO) Undersecretary at Palace Press Officer Claire Castro, hindi dapat nakatuon lamang ang pansin ng publiko sa mungkahing bumili ng mga balde, kundi pati sa mas malawak na layunin ng pamahalaan na maghanda sa posibleng epekto ng matinding tagtuyot.
Binigyang-diin din ni Castro na hindi makatutulong ang palagiang negatibong pagtingin sa mga hakbang ng administrasyon, lalo na sa mga paghahandang naglalayong tugunan ang mga posibleng suliranin sa suplay ng tubig.
Kabilang sa mga nagpahayag ng pagdududa sa payo ng Pangulo si Vice President Sara Duterte, na kinuwestiyon ang maaasahan ng publiko mula sa liderato ni Marcos kasunod ng kaniyang pahayag tungkol sa mga balde.
Nauna nang pinayuhan ni Marcos ang publiko na maghanda ng mga balde na maaaring gamitin sa pag-iipon ng tubig-ulan bilang paghahanda sa inaasahang epekto ng Super El Niño.
Sa gitna ng mga batikos, iginiit ni Castro na mahalagang maging mapanuri ang publiko at timbangin din ang mga positibong hakbang ng pamahalaan, sa halip na ituon ang pansin sa mga pahayag na naging tampulan ng panunuya.
