Ginbalik sang mga manugpangisda sa Zambales ang ila panawagan nga mapabalik ang kahilwayan nila sa pagpangisda sa Bajo de Masinloc ukon Scarborough Shoal, bangod sa padayon nga presensya sang mga barko sang China sa amo nga kadagatan.
Suno kay Zambales Rep. Doris “Bing” Maniquiz, nagbalik ang pagkadismaya sang mga mangingisda matapos maggowa sa impeachment trial ni Vice President Sara Duterte ang report bahin sa P319.33 milyones nga remittance nga nabaton sang Cale88 Foods Corp., nga gin-angot sa bana sang Bise Presidente nga si Atty. Manases Carpio.
Ginpahayag ni Maniquiz nga amat-amat na nga nagapangita sang iban nga pangisdaan ang mga mangingisda bangud sa kahadlok sa pagpamahog sang mga barko sang China, lakip na ang paggamit sang water cannon.
Apang, bangud sa nasambit nga isyu sang remittance, gin-usisa liwat sang mga manugpangisda koun ngaa mabudlay para sa mga Pilipino nga makapangisda sa kadagatan nga madugay na nila nga ginasaligan para sa ila pangabuhian.
Suno sa kongresista, madamo anay sang isda sa Bajo de Masinloc, nga malapit lamang sa Zambales.
Nagalaum ang mga manugpangisda nga maipaathag ang ginreport nga mga transaksyon sang Cale88.
Nagpromisa man si Maniquiz nga mangayo sang congressional inquiry sa pagbukas liwat sang sesyon sang Kongreso sa Nobyembre agud mahibaluan ang kamatuoran kag matubag ang madugay na nga reklamo sang mga komunidad.
Ginalauman man sang mga mangingisda nga matalakay ang ila sitwasyon sa masunod nga pag-istoryahanay ni President Ferdinand “Bongbong” Marcos Jr. kag sang mga representante sang China.
Samtang, ginpahayag ni Maniquiz nga naghalad sang bulig pangabuhian ang mga lider sang Kamara paagi sa paghatag sang 60 ka mga kagamitan nga nagadani sang mga isda, agud mapahapos ang pagpangisda sa mga katubigan malapit sa baybayon.
