Nagpadul-ong sa Kyiv ang mga representante sang Estados Unidos nga sanday Jared Kushner kag Steve Witkoff agud makigkita kay Ukrainian President Volodymyr Zelenskyy bahin sa pag-untat sang giyera sa tunga sang Ukraine kag Russia.
Natabo ang pagtililipon sang Domingo matapos makigkita ang duha ka opisyal kay Russian President Vladimir Putin sa Moscow sang Sabado.
Samtang, nagpasalamat si Zelenskyy sa pag-abot sang delegasyon sang US kag ginpabutyag ang importansya sang paghimo sang tanan nga paagi agud matapos na ang madugay nga kinagamo.
Gintawag ni Witkoff nga maayo kag makahulugan ang ila pag-istoryahanay.
Suno naman kay Kushner, handum ni US President Donald Trump nga makahimo sang husto nga kondisyon angot sa malawig nga kalinong.
Nag-upod man sa ikaduha nga bahin sang miting ang mga national security adviser sang United Kingdom, France kag Germany bilang suporta sa Ukraine.
Apisar pa nga temporaryo nga nag-untat ang mga pag-atake sa mga kapital sang duha ka pungsod sa tion sang pagbisita, nagpadayon gihapon ang mga engkwentro kag drone attacks sa iban nga lugar sang Ukraine kag Russia.
