Ginaduso sa Kongreso ang pagdugang sang 2,021 ka guidance personnel sa mga pampubliko nga buluthuan sa 2027, upod ang ginahagna ₱802 milyon nga pondo agud mapabakod ang mental health kag child protection services sang mga estudyante.
Suno kay House Minority Leader Marcelino Libanan, yara sa ginahagna nga ₱7.2 trilyon nga national budget angot sa 2027 ang pag-deploy sang 1,800 school counselor associate positions kag 221 school division counselor positions sa DepEd.
Ginpahayag ni Libanan nga importante ang dugang nga counseling personnel, ilabi na bangud sa mga kaso sang bullying, school violence kag iban pa nga problema nga mahimo makaapekto sa mental kag emosyonal nga kahimtangan sang mga estudyante.
Gindugang niya nga indi igo ang physical security para maproteheran ang mga buluthuan.
Kinahanglan man palig-unon ang emotional kag psychological support sang mga estudyante, kag kabahin sa una nga depensa sang buluthuan ang guidance counselors sa pag-ila sa mga estudyante nga nagakinahanglan sang bulig.
Ginpangabay man ni Rep. Libanan ang mga pribado nga buluthuan nga pasangkadon ang ila counseling services, bangud responsibilidad sang bug-os nga komunidad ang kaayuhan kag seguridad sang mga kabataan.
