Kontento ang isa ka tricycle driver sa Koronadal City sa pagpangulo ni Presidente Ferdinand “Bongbong” Marcos Jr., nga para sa iya, nagakaangay lamang sa sitwasyon sang pungsod ang kasamtangan nga administrasyon.
Sa interview sang Bombo Radyo Koronadal, ginpahayag ni Abraham Layes nga wala siya sang daku nga rason agod magkondenar sa presidente, bangod nagapati siya nga bisan sin-o pa ang magpungko sa puwesto, indi man gilayon nga makita ang daku nga pagbag-o sa pungsod.
Suno kay Layes, kontento siya sa administrasyon ni Marcos, ilabi na sa mga bulig nga ginahatag sa ordinaryo nga mga Pilipino paagi sa nagkalain-lain nga programa sang gobyerno.
Apang, ginpahayag man niya nga daw wala na sang daku nga paglaum nga magnubo ang presyo sang mga balaklon, bangod bisan pa magpanawagan ang publiko, nagapati siya nga padayon gihapon ini nga magasaka.
Para kay Layes, kinahanglan na lamang nga magpadayon ang mga pumuluyo sa pag-atubang sang nagataas nga gasto sa pangabuhi, bisan wala siya nagapaabot sang daku nga solusyon halin sa gobyerno sa isyu sang presyo.
Ang iya pahayag nagapakita sang panindugan sang isa ka ordinaryo nga mamumugon nga kontento sa liderato sang presidente, apang nagaatubang man sa realidad sang nagataas nga presyo sang mga panguna nga kinahanglanon.
