Ginpangabay ni Senator-judge Camille Villar sa impeachment court nga hunahunaon sing maayo ang kabalak-an sang prosecution kag depensa antes magpagwa sang ruling nahanungod sa pagbag-o sang pagkasunod-sunod sang mga witness.
Suno kay Villar, pila na ka beses nga nagbag-o ang witness presentation samtang nagapadayon ang impeachment trial batok kay Vice President Sara Duterte.
Ginpunto niya nga importante nga talupangdon ang mahimo nga epekto sang amo nga pagbag-o sa duha ka panig, ilabi na sa dalagan sang paglilitis kag sa tion nga kinahanglan sang prosecution kag depensa para mapangandaman ang ila mga pamangkot kag presentasyon.
Nagtuhaw ang isyu matapos mangabay ang prosecution nga unahon anay ang pagpresentar sang witness halin sa Bureau of Internal Revenue ukon BIR, bangud indi makadalo ang ila presenting lawyer nga si Atty. Erwin Matib tungod sa iya pagkasakit.
