Naglab-ot sa P150 kada biyahe ukon P300 kada adlaw para sa balikan nga byahe ang ginabaydan sang mga residente nga kinahanglan mag-agi sa mas malayo nga ruta bangud sa pagkaguba sang taytay sa Zigzag Road, Tboli, South Cotabato.
Ini ang nangin pahayag ni Punong Barangay Dante Tidula Sr., sang New Dumangas, T’boli, South Cotabato, sa interview sang Bombo Radyo Koronadal.
Suno kay Tidula, dako ang epekto sang pagkaguba sang taytay nga amo ang koneksyon sang walo ka barangay, ilabi na sa pangabuhian sang mga negosyante, pag-eskwela sang mga estudyante, kag biyahe sang mga motorista.
Bangud sini, naglunsyar sang inisyatiba ang Barangay Local Government Unit (BLGU) sang New Dumangas paagi sa sand bagging sa naputol nga bahin sang taytay agud mabalik ang pag-agi sang mga motorsiklo kag iban pa nga salakyan.
Ginalauman nga matapos sa sulod sang tatlo ka adlaw ang temporaryo nga solusyon samtang ginahulat ang permanente nga pagkay-o sang naguba nga taytay, kun sa diin ginpahayag ni Tidula nga wala na sila sang iban pa nga mahimo sa baylo nga maghulat sa panahon nga permanente na nga makay-o ang nasambit nga taytay.
