Nagpalab-ot na sang bulig kag ayuda ang Local Government Unit (LGU) sang Koronadal City sa 51 ka pamilya sa Barangay Sto. Niño nga naapektuhan sang pagbaha bangud sa mabaskog nga pag-ulan.
Sa interview sang Bombo Radyo Koronadal, ginpahayag ni Koronadal City Mayor Erlinda Araquil nga gilayon nga nagresponde ang lokal nga panguluhan pinaagi sa paghatag sang kinahanglanon nga suporta sa mga pamilya nga naapektuhan sang kalamidad.
Suno sa alkalde, padayon ang koordinasyon sang city government sa mga natungdan nga ahensya agud mapadasig ang pagpatuman sang mga kinahanglanon nga tikang, lakip na ang pagkay-o kag paglimpyo sang mga kanal kag alagyan sang tubig.
Ginpahayag niya nga importante ang ini nga mga tikang agud mahagan-hagan ang epekto sang pagbaha kag maproteheran ang mga residente, ilabi na sa tion sang mabaskog nga pag-ulan.
Bangud sini, ginpasiguro man sang lokal nga panguluhan nga magapadayon ang ila pagmonitor kag paghatag sang bulig sa mga lugar nga naapektuhan sang pagbaha sa syudad.
