Ginpaklaro ni Senador Robin Padilla nga ang iya pahayag nga “Komunista po ako” nagatumod sa pagpatuman sang social justice ukon hustisyang panlipunan, kag indi sa armado nga pakig-away ukon rebolusyon.
Ginpaklaro ini sang senador matapos maglapta ang nagkalainlain nga reaksyon sa iya kontrobersiyal nga pahayag.
Suno sa iya, ang iya ginapatuhuyan amo ang mas una nga konsepto sang komunismo nga nagabase sa pagbinuligay, pagpakig-angot sa isigkatawo kag pagkapareho sang tanan.
Ginpahayag man ni Padilla ang Christian Communism kag ang Mu’akhat system sang mga una nga Muslim sa Madinah bilang ehemplo sang pagbinuligay kag pagbahinay sang kabtangan.
Ginpasiguro man sang senador nga kontra siya sa kapintas kag wala siya nagapatuhoy sa Marxist-Leninist kag Maoist nga mga ideolohiya nga nalambigit sa armado nga rebolusyon.
Madumduman nga nabuy-an ni Padilla ang kontrobersiyal nga pahayag samtang nagapamangkot siya sa isa ka prosecution witness sa ikalima nga adlaw sang impeachment trial ni Vice President Sara Duterte.
