Nagpahayag si singer-actress Jessa Zaragoza nga nagaatubang sang health challenges ang iya bana nga si Dingdong Avanzado, nga nagresulta sa ila balik-balik sa balay-bululngan.
Sa iya social media post, ginpaathag ni Jessa kun ngaa wala siya kayo makita sa publiko ukon “MIA,” bangud ginahatagan niya sang prayoridad ang pag-atipan kag recovery ni Dingdong.
Suno kay Jessa, nagumpisa ang ila pagtilaw sang Father’s Day sang Hunyo 22, kag nag-agi si Dingdong sa operasyon kag isa pa ka pag-confine sa ospital.
Wala niya ginpahayag ang eksakto nga kondisyon sang iya bana.
Ginpahayag man ni Jessa nga indi mahapos ang pag-atipan sang isa ka pinalangga nga may balatian, apang nagpasalamat siya sa ila pamilya, abyan, kag mga doktor nga naghatag sang bulig kag suporta.
Nagpadala man sang mensahe sang pag-ayo kag pagpalig-on ang mga artista kag fans para kay Dingdong Avanzado.
