Indi kinaandan nga makaeksperyensya sang pagbaha ang Barangay B.S. Aquino Jr. sa Norala, South Cotabato, apang nagtaas ang tubig sa pila ka purok matapos ang mabaskog nga pagbunok sang ulan.
Sa interview sang Bombo Radyo Koronadal kay Kagawad Simplicio Relator, iya ginpahayag nga ang tubig-baha nga nagasulod sa ila barangay nagahalin sa Barangay Quiriño, lakip na sa Baryo 11 kag sa mga kaiping nga purok.
Suno kay Relator, kon wala sang mabaskog nga ulan, wala man sang seryoso nga pagbaha sa ila lugar, kag kon mag-untat na ang ulan, madasig man nga nagahupaw ang tubig.
Gani, ginakabig nga isa sa dapat tutukan sang barangay ang pagpaayo sang ila drainage system agud malikawan ang pagtigayon sang tubig-baha sa mga apektado nga purok sa tion sang mabaskog nga ulan.
Lakip sa mga ginapatigayon nga tikang amo ang paglimpyo kag pagpadaku sang mga nagaluntad na nga kanal, pati ang paghimo sang dugang nga mga alagyan sang tubig sa mga bahin sang barangay nga nagakinahanglan sini.
Paagi sa sini nga mga tikang, ginapaabot nga mangin mas hapsay ang pag-agos sang tubig-ulan kag maminusan ang posibilidad sang pagbaha sa ila lugar sa tion sang mabaskog nga pag-ulan.
