Inilarawan ni Reina Mercedes Vice Mayor Atty. Harold Respicio na tila may halong sarkasmo ang pagbati sa kanya ni Department of the Interior and Local Government (DILG) Secretary Jonvic Remulla matapos lumabas na negatibo siya sa isinagawang drug test.
Sa panayam ng Bombo Radyo Cauayan, sinabi ni Respicio na nauunawaan niya ang tungkulin ng kalihim na kumilos sa mga usaping may kinalaman sa mga lokal na opisyal, partikular sa mga insidenteng maaaring mangailangan ng imbestigasyon o kaukulang aksyon.
Gayunman, iginiit ng bise alkalde na handa niyang harapin ang anumang hakbang na maaaring ipataw sa kanya, kabilang ang posibleng suspensyon kaugnay ng kontrobersiyang kinasasangkutan niya.
Matatandaang hinamon ni Remulla si Respicio na sumailalim sa drug test matapos kumalat sa social media ang video ng mainitang pagtatalo ng opisyal sa ilang opisyal ng barangay.
Bilang tugon, nagpasailalim si Respicio sa pagsusuri sa isang ospital sa Maynila, kung saan nagnegatibo siya sa ilegal na droga.
Ayon sa ulat, umabot sa ₱28,011 ang ginastos ng bise alkalde para sa nasabing pagsusuri.
Sa kabila ng resulta ng drug test, patuloy namang pinag-aaralan ng DILG ang mga posibleng susunod na hakbang kaugnay ng insidenteng naging viral sa social media.
Samantala, nananatiling mahalaga ang magiging resulta ng pagsusuri ng ahensya sa insidente upang matukoy kung may batayan para sa anumang kaukulang aksyon laban sa lokal na opisyal.
