Opisyal na nga ginkilala sang World Bank (WB) ang Pilipinas bilang isa ka Upper-Middle-Income Country (UMIC) matapos malab-ot sang pungsod ang kinahanglanon nga Gross National Income (GNI) per capita para sa amo nga kategoriya.
Base sa pinakabag-o nga assessment sang World Bank sini nga Hulyo, nagsaka sa $4,850 ang GNI per capita sang Pilipinas, nga mas mataas sa $4,636 nga threshold para makabahin sa mga upper-middle-income nga pungsod.
Suno sa Department of Economy, Planning, and Development (DEPDev), ang pagsaka sang Pilipinas resulta sang padayon nga pagtubo sang ekonomiya, maayo nga pagdumala sa macroeconomy, kag pagpatuman sang mga malawig nga reporma.
Ginpahayag sang ahensya nga nagtubo ang gross domestic product (GDP) sang pungsod sang average nga 5.8 porsyento halin 2021 tubtob 2025. Bangud sini, nagsaka man sang 8.5 porsyento ang GNI per capita sang Pilipinas sang 2025, nga naghatag sang dalan agud opisyal nga makabahin ang pungsod sa upper-middle-income category.
Suno kay DEPDev Secretary Arsenio Balisacan, nagapakita ang bag-o nga status sang kabakod kag kalig-on sang ekonomiya sang Pilipinas bisan pa sa mga pagsulay nga ginaatubang sang pungsod.
Ginalauman man sang DEPDev nga ang bag-o nga pagklasipikar magapabakod sang credit profile sang Pilipinas, magapataas sang pagsalig sang mga mamumuhunan, kag magadani sang mas madamo nga de-kalidad nga pamuhunan nga makahatag sang dugang nga mga trabaho para sa mga Pilipino.
Bisan mahimo nga magnubo ang access sang Pilipinas sa pila ka concessional ukon low-interest development loans bangud sang pagsaka sang income classification sini, ginpabutyag ni Balisacan nga mas daku ang benepisyo nga madangat sang pungsod pinaagi sa mas malapad nga oportunidad sa internasyonal nga merkado.
Ginkilala man sang kalihim ang daku nga kontribusyon sang mga Overseas Filipino Workers (OFWs) sa pag-angkon sang sini nga milestone. Apang, ginpahayag niya nga padayon nga ginatinguhaan sang gobyerno ang paghimo sang mas madamo nga de-kalidad nga trabaho sa sulod sang pungsod agud mangin kapilian na lamang, kag indi na kinahanglanon, ang pagtrabaho sa iban nga pungsod.
Sa pihak sini, ginpabutyag sang gobyerno nga padayon ang ila pagtinguha nga masiguro nga mabatyagan sang tanan nga Pilipino ang benepisyo sang padayon nga pagtubo sang ekonomiya.
