Nagpagwa sang Sabado, Hunyo 20, ang Philippine Space Agency (PhilSA) sang satellite data nga nagapakita sang mga pagtibusok sang duta nga resulta sang mabaskog nga linog sa Mindanao sang Hunyo 8.
Suno sa PhilSA, natumod ang mga landslide sa pila ka barangay sa Glan, Sarangani kag Jose Abad Santos, Davao Occidental.
Ginatayang nagaabot sa 137.87 ektarya ang kabug-usan nga kalaparon sang mga lugar nga posible naapektuhan.
Gingamit sang ahensya ang mga laragway halin sa Sentinel-2A kag Sentinel-2B satellites agod matumod ang pagkalagas sang vegetation antes kag pagkatapos sang linog.
Ang vegetation nagarefer sa mga tanom, kahoy, hilamon, kag iban pa nga mga pananum nga nagatubo sa isa ka lugar.
Apang ginsiling sang PhilSA nga kinahanglan pa ini beripikahon sa aktuwal nga lugar agod masiguro ang mga resulta.
Nagaabulig ang satellite data sang PhilSA sa National Disaster Risk Reduction and Management Council (NDRRMC) sa pagbantay sang sitwasyon kag sa pagtumod sang mga prayoridad nga lugar para sa agarang responde.
Samtang, nagdangat na sa 76 ang numero sang mga napatay sa linog, samtang sobra 1.45 milyon ka tawo ukon sobra 348,000 ka pamilya sa Mindanao ang padayon nga apektado sang kalamidad.
