Masobra 51 ka pamilya ang naapektuhan sang pagbaha sa nagkalain-lain nga bahin sang Koronadal City, lakip ang lima ka pamilya sa Barangay Zone III nga temporaryo nga ginbakwit sa barangay hall bilang preventive measure.
Ini ang nangin pahayag ni City Disaster Risk Reduction and Management Officer Cyrus Urbano,sa interview sang Bombo Radyo Koronadal.
Suno kay Urbano, nakaeksperyensha ang pila ka barangay sa syudad matapos ang mabaskog nga pag-ulan nga naglawig halin hapon tubtob sa gab-i subong nga semana.
Suno sa iya, nag-deploy ang City Disaster Risk Reduction and Management Office sang response teams sa mga flood-prone areas, lakip ang Balmore Street, Purok Malipayon sa Barangay Zone III, kag Sitio Cogonal sa Barangay Topland, agud masiguro ang gilayon nga pagresponde sa mga naapektuhan.
Gindugang pa sang opisyal nga may ngaluntad man nga landslide sa dalan pakadto sa Mambukal Hot Spring, samtang temporaryo man nga ginpasirad-an ang taytay nga nagakonektar sa Barangay Topland kag Barangay Santa Cruz, Tampakan bangud sang naguba nga bahin sini kag padayon pa nga ginapa-assess ang kahimtangan sang estruktura.
Bangud sini, nagpanawagan man ang CDRRMO sa publiko, ilabi na sa mga nagaestar sa flood-prone kag landslide-prone areas, nga magpabilin nga alerto kag magsunod gilayon sa mga mando sang otoridad kun kinahanglan ang pag-evacuate.
