-- ADVERTISEMENT --

Indi lamang ang pamilya ni late photojournalist Reynaldo Mumay kundi ang tanan nga pamilya sang mga biktima sang 2009 Maguindanao massacre ang padayon nga nagahulat sang hustisya, samtang may pila na sa ila nga nagmasakit kag nagkalamatay nga wala makita ang resulta sang ila malawig nga pagpangita sang kamatuoran.

Sa interview sang Bombo Radyo Koronadal, ginpahayag ni Ma. Reynafe Mumay-Castillo, bata sang photojournalist, nga mabudlay para sa mga pamilya nga magpadayon sa paghulat nga wala gihapon sang kasiguruhan kon san-o makabaton sang hustisya ang ila mga pinalangga.

Apesar 17 ka tuig na ang nagligad, wala gihapon nagauntat si Mumay-Castillo sa pagpanawagan sang hustisya para sa iya amay, nga tubtob subong wala pa makita ang patay nga lawas.

Padayon man niya nga ginapaambit ang eksperyensya sang ila pamilya agud mapabilin sa panumduman sang publiko ang natabo kag malikawan nga madula sa atensyon ang kaso sang massacre.

Isa sa ila pamaagi amo ang documentary film nga 58, nga nagasaysay sang trauma kag mabug-at nga eksperyensya sang mga pamilya sang biktima.

Gin-gamit sa pelikula ang rotoscoping animation agud maipabutyag ang istorya sa mas masangkad nga audience.

Sa pihak sini, may mensahe man si Mumay-Castillo para sa publiko, ilabi na sa mga pamatan-on, gani mangin aware sa kamatuoran, mangin kritikal sa mga impormasyon nga ila mabaton kag mangin responsable sa pagpili sang mga lider paagi sa pagboto.