Yara gihapon sa evacuation centers ang 9,101 ka pamilya ukon 31,456 ka indibidwal bangud sang mabaskog nga ulan nga dala sang bag-o nga tropical cyclones Luis kag Maymay kag habagat, suno sa National Disaster Risk Reduction and Management Council.
Kabahin ini sang 1.4 milyon ka pamilya ukon halos lima ka milyon ka indibidwal nga naapektuhan sa nagkalain-lain nga rehiyon sang Luzon kag Visayas.
Nagre-record ang NDRRMC sang 23 ka patay nga may kaangtanan sa mabaskog nga ulan.
Sa Benguet, 15 ka indidbidwal ang napatay bangud sang mga landslide.
Isa ka tawo ang napatay sa La Union bangud sang pagkalumos, samtang tatlo ang napatay sa Rizal bangud sang rockslide kag pagkahulog sang kahoy.
Tatlo man ang napatay sa Batangas bangud sang pagkalumos, electrocution kag landslide, samtang isa ang napatay sa Quezon bangud sang pagkalumos.
Samtang, 17 ka indibidwal ang napilasan kag tatlo ang ginapahayag nga missing.
Sobra 1,800 ka balay ang nadamage, lakip ang 178 nga totally damaged bangud sang kalamidad.
Gin-estimar sa P3.3 bilyon ang damage sa imprastraktura, samtang P689 milyon naman ang halit sa agrikultura.
Sa kasamtanganan, nakahatag na ang gobyerno sang P654 milyon nga bulig sa mga naapektuhan sang kalamidad.
